簡介
主持人：李秋婷
藝術、文化，蘊藏令生活更豐盛更美好的力量。逢星期六晚出版，一本聽得到的藝文雜誌，帶來不同專題、人物訪問以及最新的藝文資訊。
#香港電台文教組
#藝文一格 culture.rthk.hk
最新
#315 剎那永恆：攝影師與雀鳥的故事 (下) / 一舖清唱 《大殉情.死都要唱》/ 藝聞全世界： 藝術家Marco Evaristti新作引發爭議 / 香港話劇團《你好，冥王星》、香港小交響樂團 法國五月藝術節 《流浪者三重奏香港首演》及 《貝多芬三重協奏曲》
現場演出嘅珍貴之處，在於每次都獨一無二，而無伴奏合唱就係其中一種有機嘅演繹方式。無伴奏合唱劇團一舖清唱，擅長以無樂器伴奏嘅純人聲演唱結合戲劇等舞台元素，呈現舞台嘅多樣性。即將再三搬演舞台嘅作品《大殉情.死都要唱》喺音樂等各方面都有調整、修改，演出嘅音樂總監、作曲編曲高世章Leon會講講作品嘅概念來源、令作品變得有趣嘅秘方，以及今次邀請歌手葉巧琳Mischa加入嘅原因。聯合藝術總監盧宜均Anna今次繼續參與演出，亦會擔當歌唱指導及編曲，佢會講講唱無伴奏合唱嘅巧，同時分享經歷三次演出嘅進化之路。
攝影師Collin繼續帶喺「剎那永恆系列」，帶出生態攝影樂趣。到底領角鴞、白頸鴉、喜鵲、噪鵑同佢有咩獨特故事？而過程中又帶出乜嘢反思？
有興趣嘅朋友，記住收聽逢星期六晚9點鐘香港電台第二台出版嘅藝術文化雜誌<藝文谷>喇！
重溫
#283「 在森林和原野…...」 / 築覺漫遊系列： 恩瑞克·米拉萊斯 / 藝聞全世界：名畫爭議 / 藝在無窮：恩瑞克·米拉萊斯 / 香港演藝博覽
主持人：李秋婷
雖然歌仔有得唱「在森林和原野是多麼的逍遙」，但喺鄉郊生活無城巿咁便捷，夏天多蚊蟲又無得嘆冷氣，仲要做粗重嘅農務，點解仲有一班人願意放低一切過住深居簡出嘅生活呢？
自然畫家及作家葉曉文Human幾年前參與梅子林藝術活化計劃，深入新界東北，從此佢同荔枝窩結下不解緣。呢種鄉郊生活對Human產生咗乜嘢翻天覆地嘅轉變呢？
現今嘅建築師借助科技幫助，相對容易設計到一啲外型奇特嘅建築物。生於1955年嘅恩瑞克·米拉萊斯Enric Miralles被喻為天才建築師，而佢畫嘅建築繪圖，就連專業建築師都要花唔少時間先睇得明，咁Enric嘅作品有咩獨特之處？本地建築師洪彬芬Fanny 帶領大家喺「築覺漫遊系列」，欣賞Enric 嘅名作，包括：Igualada Cemetery, 聖卡特琳娜市場(Santa Caterina Market Hall) 及蘇格蘭議會大樓 (Scottish Parliament Building)。
有興趣嘅朋友記住唔好錯過喇！
