電影講述「殺手三人組」曾經叱咤一時，由謝賢飾演嘅「田立秋」刀法了得；馮寶寶飾演嘅「蔡鳳」擅長使用鐵鍊；而林雪飾演嘅「葉一叢」則擁有高超嘅駕駛技術。

隨著時代變遷，三人本已退隱江湖多時。不過，呢三位「過氣殺手」喺步入黃昏之年，竟然重操故業，組成「耆英天使」，送厭世長者上路⋯⋯

電影透過呢三位被標籤為「廢老」嘅角色，帶出年老為生活帶嚟嘅難處。其中呢句電影金句，就反映出「蔡鳳」對於被個仔同新抱嫌棄，一心只係想謀住佢副身家，表示無奈同憤慨。

如果人生真係好似對白所講「只係為咗等嗰一下喪鐘」，我哋應該點樣喺呢段漫長嘅等候入面，搵返一點點希望，而唔係單純咁「等死」呢？