香港的世外桃源：荔枝窩、鹽田梓

香港人多擠迫，要去搵一片悠閒樂土都唔係一件易事，今集為大家介紹兩個偏遠而值得一去嘅香港「世外桃源」，分別係荔枝窩同鹽田梓。先介紹荔枝窩，呢個地方位於新界東北部，係昔日新界東北群村最富庶嘅鄉村之一。荔枝窩歷史悠久，早喺16世紀就已經有記載，呢條村嘅另一個特色係位於地質公園範圍內，所以周邊有唔少生態奇景。而「鹽田梓」又叫鹽田仔，係位於新界西貢海嘅島仔。島上面嘅鹽田梓村，有三百年歷史，而全村村民都信奉天主教，所以有「教友村」之稱。鹽田梓原本係一條小漁村，據講因為島上有鹽田而得到呢個名。荔枝窩同鹽田梓點解咁值得介紹？原因係當地有極具價值嘅生態環境同歷史文物呀！

星期五清晨4點至5點<大自然之聲>，帶你走入荔枝窩、鹽田梓呢兩個世外桃源。