呢句對白，係波蘭電影《盲打誤撞》入面男主角維特克嘅爸爸同佢講嘅一番說話。

父親嘅教誨，一直深深影響住男主角維特克嘅性格塑造。而爸爸嘅離世，更加觸發咗佢要追火車趕往華沙嘅重要一幕——因為趕上與否，命運將徹底改寫。

諷刺嘅係，喺電影入面男主角嘅三段人生，佢嘅本性始終如一，但政治立場、社會地位，甚至最終結局都截然不同，似乎一切都不過係隨機嘅際遇，全憑命運「盲打誤撞」嘅擺布。

如果話「性格決定命運」，但性格嘅形成又咁大程度上受他人影響——咁我哋仲有咩理由，為自己嘅道德抉擇負責呢？而即使性格不變，只要隨機際遇有別，結局已經天淵之別，咁唔通我哋之所以做到好人，都只係因為「好運」？