「你好彩呀！差啲就趕唔切喇！」呢句對白，出自波蘭電影大師-奇斯洛夫斯基 (Krzysztof Kieślowski) 嘅電影《盲打誤撞》 (Blind Chance) 。

電影入面，年輕人維特克 (Witek) 喺月台上拼命追趕一班開往華沙嘅火車。當佢成功跳上車之後，一位陌生嘅乘客就對佢講出呢句說話。係呢個情景下，乘客係恭喜緊佢夠「好彩」，但當我哋知道，男主角維特克其實仲有另外兩段平行人生就會發現，呢句祝福更加似係命運對佢嘅一聲嘲弄。因為能唔能夠趕上呢一班火車，將佢推向三條完全唔同嘅路：成為政府嘅一員、加入地下組織，或者回歸平淡做一位醫生。

三條路，三種命運，但同一個性格、同一片初心，只因為趕唔趕得上火車，就被命運推去完全相反嘅道德境地。咁我哋平時引以為傲嘅「正確選擇」，究竟係出自自由意志，定係只不過因為我哋夠「好彩」？